2014 – Zomi Census Conference sunga thu kigente

Zomi ka deih luat manin thong 9 vei ka kia a, ka zawn lawh dikdek hi. Kei aituam ding bek ngaihsun hileng a hau mahmah ding ka hihi. –Pu Cin Sian Thang

Tu aa ih Census pen Zeisu hong suah hun leh Census hun a kituah bang dan hi ci in manpha diak ka sa hi. Zomi pastor teng hong makai leh hoihzaw kaan ding hi. – Pu Gin Kam Lian

Tu aa ih Census pen Pasian hong vaihawm sak ngiat thu ahihi. Zomi te kipawl hun mahmah ta hi. – Tg. Pau Lun Min Thang

Ka kisiik lohna dingin Zomi ka cipah hi. –Dr. Khen Za Sian

Ei Zomi hinapi ih kihel loh khak ding leh ih kinutsiat khak loh ding thupi ngaihsut tek ni. –S.K . Gin Khan Pau

Mipil a kici khat in Zomi a langpan leh apil taktak hi dingin ka um kei hi. – Dr. Zogam, Zasuan Beh

Guai, ute naute aw bangbang hitaleh Zomi kici diamdiam photphot dih ni. – Dr. Pau Khan En

Dotna leh Dawnna
1.Tua ahileh a omsa Code khat peuh ahihkei leh Zo Code zangh pah leng hi thei lo ahiam?
= Min thak deihte in a omsa Code khat peuhpeuh zangh thei lo hi. Kumpi thu hi. Tua ahihmanin 914 Zomi aci sese ih hihi.

2. 914 pen Rhohinya te Code numbat kici hi lo maw?
= Hi tuan kei. Min thak deih khempeuhte zat ding hi. Na up kei leh tu mahmah in zong phone tawh U Khin Ye kiho thei pah hi.

3. Democracy upadi ah minam khat suah theihna dingin mimal kiciangtan a hiam?
= Nang B.A khat hinapi cin Kawlgam upadi thei nai lo na hiam? Kumpi in 0.1% mimal tawh ciangtan ahihman in ei teng Meeting a tu ih hihi.

4. Ei Code tek mah zangh lehang hi thei lo hiam? Hoih pen lo ding hiam?
= Ei Code tek bel kizangh thei lua. Minam ngah theihna dingin Census 0.1% mimal tawh kikim mimal tul 55 a cing ding om lo hi hang. Tua zah ih cin theihna dingin ei teng ih kipawl a kul ngiat hi ta hi.

5. Tua ahihleh Chin mah ah om khinkhian leng eleh?
= Hi thei lua hi. Ahihang in Chin minam om lo a, Zomi nam bek om hi. Chin minam ka hi aci ih om leh Chin Code 401 zat kul hi.

6. Chin Code zangh lehang tu aa hong kipia ih minam Code a bei diam?
= Tu aa hong kipia Code numbat te pen Census hunsung bek a zat ding hi. Census hong bei leh a bei ding hi lel hi. Ahihhangin na hihna pen bei tuan lo ding hi. Gentehna: Zo Code 421 bei dinga Zote hihna bei tuan lo ding hi.

7. Kuki in Code nei lo ahih teh ko Kuki ten bang cih ding ka hi uh hiam?
= Kuki min na deih uleh 914 Kuki mah na ci un. Ahihangin Kukite zong 0.1% cing zo lo veve ding na hihman un 914 Zomi cipah le uteh hoihzaw ding hi.

8. Tua ahileh Zomi aci thei ding bang zah pha in na um a leh?
= Zomi a ci thei ding khempeuh pen teng khat leh alang dektak pha dinga, 914 Zomi citek lehang tuazah kivaal lai ding hi.

9. Tua ahileh Chin leh Zomi a kikhen suak ding hi ta ih hiam?
= Chin mi ka hihi aci a om leh tua te in Zomi hizaw veng e hong cih theih hun ciang dong kingak siam kul ding a, kikhen suak ding kikhen suak lo ding cih pen Pasian vaihawmna mah ngak kul ding hi.

Hih tawh kisai tuazah ci phot ni,

Lai at:
Rev. Go Za Suum.
Ph. 010 2733 438.
Email: [email protected]