A (30) na Australia Prime Minister thak Scott Morrison
Australia gam ah tulaitak Prime Minister sem a hi Liberal Party sung ah pan mun ki tuh na hong om in, amasa in Tony Abott pan Malcolm Turnbull in hong tuh to aa, zo a hih man in Prime Minister hong sem hi. Tutak ciangin Malcolm Turnbull pen alawmte in hong deihnawnlo leuleu in, Peter Button in hong tuh to hi mah ta leh hong lel mawk hi.
A hi zong August 24 ni in, a lawm te deihlohna tawh Scott Morrison in hong tuhto leuleu aa, Vote 45-40 tawh hong zo ahih manin Liberal Party Makai pi leh Australia gambup Prime Minister hong suak to a hihi.
Scott Morrison Thu a tom
Scott John Morrison pen 1968 kum May 13 in Sydney Christian inn sung pan piang in, Economic leh Geography tawh University of New South Wales pan graduate a zawh ciangin Tourism lam ah Director of the New Zealand office of Tourism and sport len in 1998 pan 2000 sem hi. 2004-2006 sung Managing Director of Tourism Australia sem in New South Wales Liberal Party State Director kum 2000 pan 2004 len hi.
2007 gambup kitelna ah House of Representatives ngah in 2010 ciangin frontbench a tutna ngah to a, 2013 gambup Liberal party kitelna ah Prime Minister lui Pu Tony Abbott in Immigration and Border Protection Minister in koih a, Tembaw tawh ong lute hangin mawhsakna lian ahih manin Minister of Social Service in kikoih a, Pu Malcolm Turnbull in Pu Tony Abbott zaa alaih khit ciangin Pu Malcolm in Treasurer Minister a sep laitak Pu Malcolm deihlo ong tam ciangin Pu Morrison in kigingkhollopi in Prime Minister angah suak hi.
Australia tangthu a Prime Minister a semlai a pawl ten deihlo in akinawl khin a 4 na hi a, tu in Pu Scott Morrison pen Australia Prime Minister sem a 30th na ding ahi hi. Thupuak, Lamhkim Samte, Melbourne