“McGuire’s Irish Pub and Brewery” pen Pensacola, Florida aom aminthang mahmah Restaurant bekthamlo, Local Landmark khatzong ahihi. Hih Pub pen 1927 kumpek in akilam hi a, hih Building pen nidangin Pensacola Fire Department te ii Firehouse khat inzong aki zangngei ahihi.
1982 kum akipan hihmun aom Restaurant pen kikhak a, ahi zongin hih Building pen “McGuire’s Irish Pub” ci in hong kithei zawta hi. Hih Building pipen 20,000 Square Foot zai ahih manin, tutna bekbek 400 val asung ah ki koihthei hi.
Tuabek thamlo asung ah inndei te pen Theme atuamtuam in zem uh a, Pipers Den, Notre Dame Room, Irish Links Room, Ruprecht O’Tolf Wine Cellar cihbang in min atuamtuam vawhkawikawi uhhi. Tuabek thamlo inndawl deina bangtung ah lim tuamtuam, gamvai nasem te lim tuamtuam, kimawlna Sport lamsang ah aminthang te lim leh Entertainers minthang tuamtuam cih te ii limbek thamlo, amau ii asuaikaihna letmat te tawh kizem dimdiam hi.
Hih “McGuire’s Irish Pub” ii alamdan phadiakna ahihleh kawmzawl tungteng ah Autograph letmat akithuhsa US Dollar bekbek kikhai phengphang hi. Hih Dollar tepen innzep nading in aki bawltawm laidal mawkmawk cihte hilo a, amannei US Dollar taktak ahihi. Innsung khempeuh ah kikhai phengphang a, avek in Million khat val phading cimawk hi.
Photo te a Size gol in na etnopleh atung ah meklecin maw…
Bangci bangin Dollar kikhai phengphang hiam cihleh?
McGuire’s Irish Pub pen 1977 kumin Fairfield Drive aom Shopping Center khat ah aki pankhia saineino khat ahihi. Ansai phuankhiapa McGuire in ahoncil in Molly kici numei khatin an ne a, tuakhit ciangin sum Dollar pekkhatlai Tip in pia hi. Tuasum pen kamneih nading ci in kawmzawl tungah khaisak hi. Tuahun akipan hih sai apai khempeuh in ngeina dankhat in nei uh a, dollar laidal tungah letmat athuhkhit uhciang in kawmzawl tungah khaisak uhhi.
1977 kum akipan tunidong Dollar sumlaidal kikhai behbeh a, sai neite in lakhia ngeilo ahih manin avekpi akigawm Million khat val phata hi. Hihpen sai neite inzong Asset khatin ciamteh uh a, US kumpi tungahzong kumsim in aki behlap zahzah Tax piatangtang uhhi.
Sum hizahzah ki guksaklo hiam?
Sum kikhai te agusim omtheizelzel hi. Ahi zongin sumtung ah letmat kithuh akimuh ciangin “McGuire’s Irish Pub” pan cih kithei ahih manin azatkhiatna panin kitheikik veve a, kuamah inzong guk dingin ngaihsunnawn khollo uhhi. Khatvei hih Pub ah nasem khatin sum kikhai te sungpanin Dollar $5000 bang aphading nagusim ngei a, tuazong azatna panin kitheikik veve hi. Tua ahih manin kuamah guktat simtham tatding asawm omkhollo hihtuak hi. ZD Sawltak
Comment piaknop aomleh...