Facebook azangden mipi te Category khenpi 4 in kikhenthei, nang koisung ah kihel?

Facebook azangden mipi te Category khenpi 4 in kikhenthei, nang koisung ah kihel?

Facebook pen 04 February 2004 kumin Mark Zuckerberg leh asangkahpih alawmte pawlkhat in hong patkhiat uh hi a, tuahun laitak in Harvard University sangnaupang tebek in azattheih dingin kibawl hi. 2006 kum ciangin kum 13 acingkhin a utpeuhpeuh in Register bawltheihding in hongkhahkhia uhhi.

Tuahun akipan Facebook pen minthang mahmah, kilimzat mahmah a, tu’n Social Media Site khempeuh lakah aminthangpen hongsuakta hi. Tulaitak nisim in Facebook azang ‘daily users” pen mi 890 million bang phaden ciliang hi.

Tukum abeisa June khasung in Facebook Users mi 2 Billion valta hi ci’n Mark Zuckerberg in ama Facebook Timeline ah tangko khia hi. Users te’n Login bawl akul Social App khempeuh lakah Facebook pen azang atampenpen hongsuakta hi. Adang aminthang zawdeuh Social App te ii User pen YouTube’s 1.5 billion, WeChat’s 889 million, Twitter’s 328 million, Snapchat’s 255 million cihbangbek ahihi.

Banghang in hizahliang in Facebook kilimzat mahmahhiam cih USA, Utah State, Provo khuasung aom Brigham Young University te’n Research nabawl uhhi.

Researchers te’n Facebook azang te hoihtak akankhiat uhciang in khenpi 4 (Group 4) in ki khenthei ci uhhi. Facebook User tepen tua Category 4 lakpan khatzawkzawk ah kihel hamtang uh cihi. Tualeh bangci bangin Category khensuk uhhiam, endih ni.

Facebook Users tepen anuai abang in Category 4 in khensuk uh a, min atuamtek vawh uhhi. Tuate pen: Relationship builders, Selfies, Town criers, Window shoppers

Relationship builders:

Hih Category sungah akihel te’n Facebook pen lawmlehgual zonna in nei uhhi. Midang khatpeuh ii laigelh pen dawngkik tangtang, kuppih tangtang uh a, apualam ah aki theihgei alawm agual tetawh apualam ah akithuahdan mahbangun Facebook tungah kithuahkhawm uhhi. Lawmta taktak ahi uhhi.

Selfies:

Hih Category sungah akihel te’n Facebook pen amauleh amau ki pholakna, ki pulakna “Self promote” in zang uhhi. Photo, Video leh Text tuamtuam Post khia uh a, midangte lunglutna attention, likes, comments cihbangpeuh adeihman bekbek uh ahihi. Midang te phattuamna apia hetloding annek laitak, khuasung vaklaitak cihbangpeuh suaksaksak leldih uhhi.

Town criers:

Hih Category sungah akihel tepen Selfies Category tetawh kilehbulh uhhi. Amau Photo leh innkuansung thu khawngpeuh mipi muhding in mawkgelh khiatkhiatlo uhhi. Tuanengneng te sangin leitung ah tulaitak bangthuthak piang, alauhuai bang natna om, bangci kidopding cihte akipan mipi te phattuam nadingin Information thupi te hawmkhiaden uhhi. Amau ii Facebook Profile nangawn laihthethu seselo, laihmanloliang in mipi te adingin theihhuai Information Sharing pen thupi sakzaw uhhi. Social Obligation neimahmah uhhi.

Window shoppers:

Hih Category sungah akihel tepen Town criers te mahbangin Social Obligation neimawhlo uhhi. Ahi zongin amau Facebook Timeline tungkhawng ah bangmah gelhkhia ngei khollo uhhi. Midang te’n Facebook ah bangteng Post khia uh cih etsimska zelzel uh a, Comment piakding cihthadah, Like mekziauding nangawngzong kinngiatlo uhhi. Mikhat ii laigelh, Photo, Video khahkhiat te amuhlam, a etlam zong kuama theihding utlo hi.

Hih Facebook Users Category 4 te lakpan in nang koisung ah naki helkha hiam? Pawlkhat te Category nihsungbang ahzong kihelkha theiding uhhi.

Related: Suicide leh Murder Video te a encikding in Facebook in nasemding mi 3000 behlapding

Ihki helkhakna Category theician in eileh ei ki phawkthakna, ki puahphatna “self awareness” in ihzat theihding thupiding hi. Facebook tungah ih laigelhkhiat, ih Comment piakte’n laigelhpa lungsim hongki langsak pahpah cih phawk huaihi. Mimal khatlekhat, pawlpi, beh, khua, party khatlekhat peuh akitot, akinialnial nadingin Facebook Timeline khawngah lai agelhgelh ihhih khakding ki etphatzelzel huai hi. Na laigelhkhiat in laisim mipi te adingin bang ngimna neihiam, ngimna hoihlo “ill-intentioned” ihneihkhak lohding thupipen hi. Genkhialh aomleh Sorry! Sawltak #zomidaily