Global Zomi Idol (Yangon Center) kidemna pan

Dear Zomi U Le Nau,

Global Zomi Idol (Yangon Center) Final kidemna 28 March 2015(Sat) ni 1:00-5:00pm sung Shalom EBC biakinn ah thupitak in kibawl a Suangzang khuami Yuzana Garden City a teng Pa Thang Khan Do leh Nu Lian Za Man te tanu upen Lia Go San [email protected] Sanpi in a khatna ngah hi. Central ZOMUS in pahtawina ks 50,000 kipia a, Mipite in la kingen kik ziahziah in pahtawina zong kipia ziahziah tek hi.

Tua pawi sung ah Zomi kipawlna tuamtuam ahi GZA, TA, ZCD, ZONU TONGLUAN, SIAMSIN, ZYA, ZO AW te pan makai te kihel kim ciat ban ah lakidem te innkuanpih te leh khua nu khua pa ahi thei teng in tha kipiciat ahih manin tha ngah huai mahmah hi.

Hungelna tawh kisai in Central ZOMUS sumkempi Rev Sangpui leh Stephen Vocal Band pan lasiam Tuatuang te in MC sem uh a, Central ZOMUS vice President 2 Dr Tual Lian Tuang in hun ap thungetna, AGS Stephen Mang leh Dr Mangsan in vaimuak lasakna, Vice President 1 Zogam Lapu TSKhai in vaimuak thugenna, GS Rev Suan Khan [email protected] in Matpiakdan gencianna, cihte hong nei hi.

Zogam Lapu TSKhai, Lianpi(Taanglungtup), Stephen Mang, leh Dr Tual Lian Tuang te in Judge sem uh hi. GZA General Secretary Rev Dr Do Suan Mung in Music thupitna leh Zomi Idol cih thulu tawh thapiakna, Tedim Association President Prof. Dr C Thang Za Tuan in Music Lam ah Zomite ih madawkdiakna thu hong gen a, Zo Aw editor Rev Dr Khen Za Sian in Zomi Idol ih cih ciangin la bek siamlo in Zomite tangthu zong hong siam mahmah un cih thapiaknate hong nei uh a tha kingah mahmah hi.