Nov. 15, 2016: Kum zalom 7 AD hun lai-in Umayyad kumpi Yazeed’ ukna lungkim loin kiphinna ah a kithat Islam phuankhiapa Prophet Mohammad’ sanggam Imam Hussein leh a sanggam lang/kimkhat (half-brother – pa kibang nu kibang lo) Abbas kici kivuina Karbala khuapi ah Shiite Muslim ten Immam Hussein’ kithahna pawkna dingin biak piakna “Arbaeen” kici ni 40 sung nei dingin a kikaihkhawm ngeingai lai takun zan in sihpih bomb kipuaksak a, nautang guk in sihna tuak hi.
Iraqte’ Interior Ministry spokesman Brig. Gen. Saad Maan in hih Karbala khuapi-a biak piakna mun suam dingin sihpih bomb puaksak mi guk hong lut sawm uh a, police ten Ain al-Tamr ah nga kaplum man uh a, a gukna pen inn sungah tai lut in, a bomb puaksak a, mi guk a sih banah mi guk in liamna tuak hi ci-in gen hi.
IS ten statement a bawlna uh-ah Shiite (Shia) Muslimte, policete leh galkapte ngimna in hih bomb puak pen ko puahsak hi ci-in pulak uh hi. ISte pen a tam zaw Sunni Muslimte hi uh a, Shiite Muslimte pen Islam biakna panin a lam pial khia mite, thudik a taisan mite (apostates) ci-in ngaihsun/koih uh a, Shiite Muslimte biakinn (mosques) zong suaksak mun mahmah uh hi.
Iraq galkap ten ISte ukna Mosul khuapi lak kik ding Oct. 17 panin galdo na kipan uh a, tu-in Mosul nisuahna lam-a ISte panmun pawl khat-ah lut zo ta uh hi kici hi. Source: Al Arabiya/ Photo: Karbala khuapi/ Thang Khan Lian
Comment piaknop aomleh...