Kuala Lumpur khuasung panin gamdangmi akigawm in 373 kiman, Boss 5 zong kiman

Kuala Lumpur khuasung panin gamdangmi akigawm in 373 kiman, Boss 5 zong kiman

Malaysia, Kuala Lumpur khuasung ah E-card kici Enforcement Card bawltheihhun Deadline abeizawh akipan Operasi panin akiman gamdangmi nasempen akigawm in 373 phakhin cih NST pan kiza hi.

Malaysia Immigration Department panin makaipipa ahi director-general Datuk Seri Mustafar Ali in agenna ah July 01 panin July 15 kikal Kuala Lumpur khuasung ah City Immigration te’n Ops Mega Operation (Operasi) akigawm in 52 vei bawlkhin uh cihi.

Tuabang in 52 vei Operasi akibawlna ah gamdangmi akigawm in 897 te thusitna kinei in, Immigration thukhun tawh akipelh gamdangmi nasem 373 te ki mansuak cihi.

Kuala Lumpur khuasung panin gamdangmi nasemte bekthamlo, tuate nasep aguan Employer (Boss) zong akigawm in 5 kimankhin hi. Tua Boss te’n anasem te uh ahunlap in E-card (Enforcement Card) bawlsaklo uh a, phalna kician Work Permit omlopi in na semsaksak uh ahih manin akiman hi ci’n Home Ministry Complex ah akibawl Press Conference ah Immigration thuneipipa in genkhia hi.

Malaysia gambup ah July 01 ni akipan Immigration Department te’n Operasi abawl ngekngek uh hi a, gamdangmi naseptheih nadingin phalna kician aneilo illegal foreign workers 3500 val kiman cih thunei te’n nungkalsung in pulak uhhi. Malaysia gambup ah akiman tuazahbang aphakhin dingin, Kuala Lumpur khuasung ah akiman tawmzaw bilbel hi. Operasi pen tusung adaizawdeuh tawh akibat hangin akiman kiaukiau kiza vevelai hi.

Hih E-card akici Enforcement Card pen Malaysia kumpi in February 15 ni in hong patkhiat uh ahihi. Malaysia gamsung ah Work Permit kician neilo in gamdangmi nasem tamlua ahih manin, tuateng tawmveisung “temporary” naseptheih nadingin avaihawmsak ahihi.

E-card bawltheih hunpen tukum February 15 akipan June 30 niciangbek hi a, E-card aki zattheih hunsung pen 15 February 2018 ciang ahihi.

Related: Malaysia gamsung ah Operasi panin akiman mi 3506 phakhin

E-card bawltheih hunding ahun apiakbeh nadingin Indonesia kumpi in Malaysia kumpi tungah ngetsak uh a, ahi zongin E-card bawltheih hunding ani ki khinto loding hi ci’n “A total no. The Government has decided not to extend.” Immigration Department pan alianpenpa Mustafar in dawngkik cih kiza hi. Sawltak #zomidaily