US, Las Vegas sungteng thautawh akapgawppa kitheita, mi 50 si, 400 liam

US, Las Vegas sungteng thautawh akapgawppa kitheita, mi 50 si, 400 liam

USA, Las Vegas aom Mandalay Bay Resort & Casino ah thautawh mipi aphiak kapgawppa pen ki theikhiata cih Fox News pan kiza hi. Tua thautawh mi tampitak akaplumpa pen kum 64 aphakhin Stephen Paddock kici a, Nevada khuasungmi “Resident” khat kici hi.

Hihpa pen Mandalay Bay Resort & Casino ah zintung in aomkhat hi a, ama zintungbup lupna Room panin agalkap kici hi. Las Vegas Police te’n agenkhiatna ah tuapa amanding in SWAT Team te apai ciangin asisa in kimu cihi.

Mandalay Bay Resort & Casino ii inndawl 32nd Floor aom Room khat asaap hi a, tuapan in Route 91 Harvest Festival Concert kibawlna pen kidaldahlian ahih manin, ama lupnakhan panin mipi amuhpeuh aphengkapgawp cimawk hi.

Las Vegas Metropolitan Police Department Undersheriff Kevin McMahill in agenkhiatna ah hihpa pen ama lupna Hotel Room sungah amanding in Police te apailian ciangin amahleh amah thautawh kikaplum cihi. Stephen Paddock ii aluanghawm gei ah amazat Rifle thau bekbek 10 valbang om cimawk hi.

Stephen Paddock pen Thursday (September 28) ni in Hotel Guest khatin zing atung ci a, tua azintungna Hotel Room panin Rifle thau honkhat tawh mipi pawibawl gualnuam in aomteng akapgawp cimawk hi.

Hih Stephen Paddock ii gamtatna, thautawh aphial kapgawpna hangin asi bekbekpen 50 bang phading kici a, aliam bekbek zong mi 400 valkhinta hi ci’n Clark County Sheriff Joseph Lombardo in genkhia hi.

Tuaban ah hihpa’n Hotel Room sungah bangci bangin tua Rifle thaute lutpihthei hidinghiam cihpen aki kansanlaitak cihi. Tuciangciang akitheihna ah thaukap pen amahbekmah hiding in ki ummawh hi.

Hih thautawh mi akapgawppa ii asanggam laiguizom khat ahi Eric Paddock in agenkhiatna ah ka sanggampa pen hihbang in adamtattheih nadingin bangmah kizoppih neilo hi. Kotheihna ciangciang ah Politics lamsang ahzong kihelna neilo, biakna lamsang ahzong kihelna neilo hi. Hihbang in agamtat pen lamdang samahmah ung, asi innkuanpih te kadahpih, ka khasiatpih mahmah uhhi ci’n genkhia hi. Sawltak #zomidaily

x

US, Las Vegas khuasung ah thua kikapna piang, mi 2 sikhin, 24 liam

US, Las Vegas khuasung ah thau kikapna piangin tuciangciang asi mi 2 phakhin a, aliam zong mi 24 bang phakhinta cih Reuters pan kiza hi. Tua thaukikapna pen Las Vegas khuasung aom Mandalay Bay Resort leh Casino Sunday ah thupiang hi ci’n Clark County Fire Department officials te’n genkhia uhhi.

Las Vegas Police te genkhiatna ah tua thautawi “Active Shooter” papen Casino asunghiam, apualamhiam ah om hiding ci uhhi. Koimunsan ah omlian cihpen kitheilo ahih manin, khuasung mipi te’n tua kuamsungteng nanawk khakei un ci’n Twitter tungtawn in LVMPD te’n pulakkhia uhhi.

Mandalay Bay akici pen Las Vegas Boulevard tungah aom hi a, McCarran International Airport agallam ah ahihi. Tua ahih manin Police te’n Las Vegas Boulevard lamzikpi pen khakcip uh a, khuasung mipi te ki hemkhiasak uhhi. Airport dongah buaina apianding ki patau mahmah hi.

Mandalay Bay ii alanglam ah Route 91 Harvest Music Festival kici pawipi akibawl laitak in thautawh kikapna apianggawp ahihi.

Jon Bessette kicipa ii genkhiatna ah Route 91 Harvest Music Festival ah pawi en in ka omlaitak hi a, nitak 10pm hunpawl in thauging tamveipi kaza cihi. Tuaciang in Stage tungah aom dimdiam Band te taikhia ngeingai uh a, mipi tezong lauthawng in kiphugawp uhhi.

Video: Mandalay Bay Las Vegas Shooting October 1, 2017

https://www.youtube.com/watch?v=s3HSNQ9zHRM

Video: Mandalay Bay Las Vegas Shooting October 1, 2017

https://www.youtube.com/watch?v=B7ixInjs0C4

Hih atung a Video Clip nihte sungah thauging akizom in kilimzak mahmah a, tuasung ah akihelkha te adingin patauhhuai mahmahmawk hi. Tulaitak Breaking News hiphot ahih manin, athu akicianzaw in aki theihbeh ciangin Update huaite kizasak kikzel ni. Sawltak #zomidaily