Malaysia gamsung ah ut hunhun in guahzu, vanging, kekkia thei ahih manin apualam ah Outdoor Activities khatpeuh neihding nasawm uh ciangin khuahun Weather Condition kancian masa un ci’n Malaysian Meteorological Department (MetMalaysia) in genkhia hi.
Kek ii denlup leh aliam cihte pen innsungah himasalo zaw in innpualam Outdoor hizaw hamtang ci uhhi. Adiakdiak in Malaysia gamsung ah Inter-monsoon Seasons in aciapteh uh April leh May kha kikal, October leh November kha kikal cihbang te ah huihpi guahpi nungin khuaphelep leh vanging, kekkia cihte tamphadeuh cihi.
Guahzuding in kipan, vanging nazakleh bangci kidopding:
- Singkung khatguak atangpo nuai ah kibu vetloding
- Mawtaw sungah na omleh aman khakcipding
- Tuigei gunkuang sungah na omleh taikhiading
- Tuitawh kisawh khaloding
- Mobile Phone te kekkiat laitak zangloding
- Electric Appliances khatpeuhpeuh zatloh hoihpen
- Kisil buksung ah omloding, kisil loding
- Aircon zong khakcipding hoihzaw
- Innpualam ah na omlaitak ahihleh singkungnuai peuhmah ah kibulo ding
- Swimming Pool sungah na omleh amanlang in taikhia ding
Leitang tung “Over Land” ah ahihleh kekkiat pen sun leh nitaklam hiphadiak a, tuipitung “Over Sea” ahihleh kekkiatpen zanlam hiphadiak ci’n MetMalaysia te’n genkhia uhhi.
Leitungbup ah Malaysia gampen kek alimkiat mahmahna gamkhat hi citciat hi. Kumkhatsung bekbek in kekkia pen Million khatval pha hi ci’n Universiti Putra Malaysia’s Centre for Electromagnetic and Lightning Protection Research (CELP) Director Prof Dr Mohd Zainal Abidin Ab Kadir in genkhia hi.
Tuapa ii genna ah innpualam Outdoor Activities khatpeuh neihding ciangin ki ginkholhna in Weather Forecast et hamtangding thupi mahmah hi. Park sung munkhatpeuh leh innpualam munkhatpeuh ah na omlaitak in vanging nazak nakleh innsung ah lutpah zaw in.
Khuaphiat namuh leh vanging nazak kikal ahuntawh kek kiatna bangtan ki gamlading cihzong kituak theihi. Khuaphiat namuhphet in aging in azuihpah leh na omna tawh kekkiatna kinai cihna hi a, aging in azuihpah keileh ki gamla zawdeuh cihna ahihi.
Malaysia gamsung ah 2008 kumpan in tudong kek ii denlup pen mi 112 phakhin a, aliampen mi 156 bang phakhin hi. (Zomi sungahzong kek ii hong denlupsak pawlkhat omkhin mawk hi)
Nung Sunday ni inzong Bandar Puchong Jaya sungah kek ii denlupding in aki ummawh nupa kopkhat Park sungah asisa in kimu hi.
Adiakdiak in Motorcycle tuangte kidop huai hi. Malay te guah tawmkhat zupeuhleh leinuai (under bridge) tengah Motorcycle tawh akhawl ngeingai uhpen guahzu alaulua zong hipah masalo uh a, kek kiatding apatau uh hizaw hi. Guah zupeuhleh Motorcycle tawh avak te leinuai ah om phengphang uh cihpen akidawm mahmah uh ahihi. ZD Sawltak #zomidaily
Comment piaknop aomleh...