Malaysia gamsung ah E-card (Enforcement Card) bawltheihding ani Deadline abeikhitzawh akipan Immigration Department te makaihna tawh Malaysia gambup muntuamtuam ah Operasi (Operation) lutpah ziahziah uhhi.
July 01 ni akipan Immigration Department Enforcers te makaihna tawh Operasi bawlin amatkhiat uh gamdangmi akigawm in 2000 val phakhinta hi ci’n Malaysia Immigration director-general Datuk Seri Mustafar Ali in zanni in genkhia hi.
VOA Burmese te genkhiatna ah tutung Operasi panin akiman Kawlgammi “Myanmar National” bekbek mi 200 val kimankhin ci uhhi. Akiman khempeuh ii 10% pen Myanmar vive cihtheih himawk hi. Tua Myanmar gammi lakah Zomi bangzah akihel khadiam cihpen kithei nailo hi.
Malaysia gamsung muntuamtuam ah Operasi omkawikawi cihpen ihzaktek ahihi. Ahi zongin koi ah lutding cihpen kuamah 100% atheician taktak ki omsamlo ahih manin, upmawh thutawh koimun ah Operasi lutding cih mawkgenkhiatloh hoihzaw khading hi.
Naikhatsung lungkhamna inzong tampitak mannei a, adiak in piteek puteek leh kumhamkhin te lungkhambaih phadiak ahih manin tuate khualna in thu akician taktaklo te mawkgenpah zuahzuah luatding kidop huai hi.
Tuzingsang zong Putrajaya Immigration Department te makaihna tawh Nilai khuasung ah Operasi lut uh a, gamdangmi phalna kician Work Permit cihte aneilo “illegal foreign workers” akigawm in mi 306 mankhia uh cihi. Construction Site sungah Operasi alut hi a, akiman tezong tuasung ah nasemte vive mah hipah hi.
Hih Operasi alutna ah Immigration Officers bekbek akigawm in 121 tak kihel uh a, tuaban ah Police Personnel zong mi 30 mah kihel uhhi. Gamdangmi nasem in aom mi 450 te abanban in sit uh a, tualak panin mi 306 amankhia uh ahihi. Akiman te lakah Bangladesh, India, Myanmar, Pakistan cihbang in gamtuamtuam pan nasemin apai te kiman uhhi.
E-card bawlhun Deadline abeikhitzawh Malaysia gamsung ah gamdangmi phalna kician neilo in nasem Operasi pan akiman vekpi pen 2000 val phakhin a, nasemte bekthamlo, nasepnei Employer (Boss) zong mi 44 kimankhin cihi.
Malaysia kumpi thunei te’n Employer (Boss) te kiangah zaksakna nei uh a, na Company sungah gamdangmi nasemte matding in amanlang in hong ap un cimawk ahih manin, tuazong lauhuai veve hi. Hong ap keileh amau thuakding hizel a, hong ap leh nasemte’n kithuakding hi. Nasem in aomte’n Boss te mit hek, etsiamding thupi khading hi. Immigration Officer te khutsung ah hongpuakvak thei uh cih phawk huai hi.
Related: Malaysia gamsung Operasi pan gamdangmi 1509 kimankhin, 28 Employer zong kiman
E-card kibawltheilai cihvai tawh kisai in ngaihsut huai thutampi omkhading hi. Malaysia Home Minister ngiat inzong E-card bawltheihhun Deadline pen kikhinto loding hi ci’n genkhia hi. Tuabek thamlo zanni inzong Malaysia Immigration director-general Datuk Seri Mustafar Ali ngait in Deadline kikhinto loding hi ci’n genkhia cihi. Tua ahih manin E-card kibawltheilai acici te kuate ahidiam, ngaihsut huai hi. July 01 khitzawh E-card ki bawltheilai acihleh sum napiakma in hoihtak kancian masa lecin cih kong deihsak uhhi. Sawltak #zomidaily
Comment piaknop aomleh...