Malaysia gamsungah Operasi hangin akiman mi 2832 phakhin, Myanmar 223 kihel

Malaysia gamsungah Operasi hangin akiman mi 2832 phakhin, Myanmar 223 kihel

Malaysia gamsung ah July 01 ni akipan Immigration Department te’n Operasi bawlkawikawi uh a, tuciangciang gamdangmi nasem akiman mi 2832 phata cih theStar pan kiza hi.

Malaysia Immigration director-general Datuk Seri Mustafar Ali in zanni Sunday ni in agenkhiatna ah Enforcement Officers te’n Malaysia gamsung aom muntuamtuam, vengtuamtuam akigam in 458 Premises bangah Operasi lutkhinta uh cihi.

Malaysia gambup ah gamdangmi nasem akigawm in 8731 te thusitna kinei in, tualakpan zanni 10:30am ciangciang akiman mi 2832 phakhinta hi ci’n genkhia hi.

Gamdangmi Work Permit neilo in akiman illegal foreign workers 2832 lakah numei 509 kihel in, naupang kumcingnailo zong 14 kihel cihi.

Akiman te lakpan in Bangladesh gammi 1101, Indonesia gammi 658, Myanmar gammi 223, Thai gammi 98, Philippines gammi 95, Vietnam gammi 94 cihbangleh adangte pen gamtuamtuam pan ahi uhhi.

Video: 23 foreign workers detained in Penang

https://www.youtube.com/watch?v=wJUuEjQu1Vc

Gamdangmi nasemte bekthamlo, nasepnei Employers (Boss) tezong akiman mi 56 phakhin cihi.

Kota Kinabalu sungahzong City Police te’n guihtheih khamtheih leh gitloh gamtatna aomdiakna mun 8 ah Operasi lut in tuasung panin gamdangmi 34 kimankhia cihi. Tua akimante lakah naupang suakcil kha 1 bek aphapan khatzong kiman cizen hi.

Related: Kuala Lumpur, Wangsa Maju vengsung aom Car Workshop khat meikangtum

Kota Kinabalu police chief Asst Comm M Chandra in agenkhiatna ah Friday ni 1am hun akipan Operasi akibawl hi a, tualak ah naupang akigawm in 21 bang kihel cihi.

Tua kumcingsa leh naupang kumcing nailo tepen Philippines gammi hiding in ki ummawh hi.

Hih E-card akici Enforcement Card pen Malaysia kumpi in February 15 ni in hong patkhiat uh ahihi. Malaysia gamsung ah Work Permit kician neilo in gamdangmi nasem tamlua ahih manin, tuateng tawmveisung “temporary” naseptheih nadingin avaihawmsak ahihi.

E-card bawltheih hunpen tukum February 15 akipan June 30 niciang ahun apiak uh hi a, June 30 ni in ahun abeita ahihi. Hih E-card pen Malaysia kumpi in sumbeilo in abawlsak uh hi a, E-card aki zattheih hunsung pen 15 February 2018 ciang ahihi. Sawltak #zomidaily