USA, Florida State sung aom Brandon khuasung ah naupang khat akemnu in mawtaw sung kinusiacip ahih manin, sisuak cih Fox 11 News pan kiza hi. Hillsborough County Sheriff’s Office te genkhiatna ah tua naupangpen pasalno kum 2 bek aphapan khat hi a, Brandon, Lumsden Road aom Shopping Center ah Tuesday ni in ki nusiacip ahih manin, sihlawh cihi.
Asi naupang ii aminpen Jacob Manchego kici a, kum 2 bek phapan hi. Kum 21 aphakhin ahi asanggamnu “Half Sister” Fiorella Vanessa Silva-Tello kicinu in akep hi a, tuani zong anasepna ah atonpih ahihi. Tuanu pen Shopping Center aom “BFF Kidz Child Care Center” kicihna ah nasem hi a, anasep hunsung in tua kum 2 bek aphapan naupangno pen amahguak mawtaw sungah anasepsung nusiacip hi.
Fiorella Vanessa Silva-Tello pen zingsang in Shopping Center ah nasemding in 9am hunpawl in tunga, tuahun akipan naupangno pen amahguak mawtaw sungah nusia hi. Nitaklam 2:30pm hunpawl Break Time ciangin naupango ending in apaileh na naklahgawp in sibup hi.
Tuaciang in amanlang in ageinai aom Dialysis Center khatah paipih a, huhna ngen hi. Dialysis Center te’nzong ahuhtheih bangin huh uh a, Fire Rescue te atun ciangin Brandon Hospital ah puaksuak uhhi. Brandon Hospital atunzawh asawtlo in si cih kiza hi.
Thuneite genna ah akemnu pen khasia mahmah hi. Naupangno asihtheih nading ngimna tawh akoih hihtuaklo a, ahi zongin Deputies te’n Criminal Investigation bawlding uh cihi. Akem numeinu zong zumah kipaipih in thudotna kinei hi. Ahi zongin bangmah danpiakna cihte omnailo hi.
Khuahun pen samahmah simpian ahih manin naupangno in athuakzolo hiding kici hi.
Ahi zongin hih mawtaw sungah anusianu pen naupang kepna “BFF Kidz Child Care Center” ah nasemkhat hi a, hihbang in mawtaw sungah naupang khatguak anutsiat pen kimawhsak mahmah hi. Anasepna kongkhatung ahzong nulehpa te muhtheih dingin “Look before you lock. Never leave a child alone in a car” cih Notice golpi kisuang biabua hi.
Mawtaw sungah naupang khatguak cikmahin nutsiatding hilo hi. Tawh nakalhma in hoihtak enpah in cih kisuang deda himahleh phawkkhalo hiam, nai 5:30 sungbang nusia khamawk ahih manin, naupangno in sihlawh pahlian hi. Hih thuthang asimkha te’n hihthu ngaihsun in nadeihsak te aki dopding uh gensawn huai mahmah hi. ZD Sawltak #zomidaily
Comment piaknop aomleh...