Tanumei nei ahih manin nausuakcil nupikhat apasal in Acid tawh buaksuk

Tanumei nei ahih manin nausuakcil nupikhat apasal in Acid tawh buaksuk

India gamsung ah papi khatin azi aluplaitak Acid tawh buaksuk cimawk hi. Azi pen nausuakcil hi a, apasal in tapa adeih mahmah hi in, ahi zongin azi nau asuak ciangin tanu khat suakkhia ahih manin, apasal lungkimlo in Acid abuak cih Daily Mail pan kiza hi.

India, New Delhi geinai aom Moradabad khuasung ah Monday ni in thupiang kici hi. Acid buak athuak nupinu pen kum 25 aphakhin khat hi a, aminpen Farah kici hi.

Acid tawh abuak apasal pen amin Siraj kici a, kum 32 aphakhin khat ahihi. Tapa deihmahmah himahleh azi in tanumei khat neimawk ahih manin, Acid abuak hi a, hihvai hangin tua apasal pen matding in Police te’n zonsan uhhi.

Nupinu pen amai, akhut leh agil cihte ah Acid hangin kanggawp ahih manin District Hospital khatah kipuakpah hi.

Nupinu ii anau numeikhat ahi Nusrat Jahan in agenkhiatna ah hihte nupa pen aki teenzawh uh kum 8 bang phakhinta cihi. Abeisa inzong tanumei khat neikhin uh a, tu’n tanumei khat neihbehkik leuleu ahih manin, apasal alungkimlo cipongmawk hi.

Amasa tanumei aneih inzong apasal te innkuan in simmawhbawl in, bawlsia niloh uh cihi. Tuabang kawmkal ah tanumei khat aneihbeh ciangin apasal te innkuanpen hehsemsem uh cihi.

Tua nupinu in agenna ah kapasal in nisim hong bawlsiat phialzongin ka tanumei 2 te kakhualna in thuakteta ding cih ka ki zawhsa ahihi. Ahi zongin kapasal in Acid liang hongbuakding in ka ngaihsunkha ngei hetkei hi. Hihbangin Acid hongbuahliang pen ka mangngilhngei hetkei dinghi ci’n khasiatak in genkhia hi.

More: India ah numei khatin amah abuansawm pasalkhat ii azang tansak

India gamsung aom namke pawlkhatte numei te’n pasal aneihding uhciangin apasal dingpen sum tampipi tawh alei uh kulsak hi. Hih nupinu zong apasal te innkuan in apasal leimanding “Dowry” sum hongpia in ci’n sikthapai uh cihi. Tanumei 2 tak neisawnsawn ahih manin, ateekte innkuan ahehgawp cimawk hi. Numei pen simmawhbawl phadiak in, pasal nangawn leikul dinmun ah koihtheimawk uhhi. Tua amanpha mahmahin a ngaihsut uh PASAL tepen kuasung panin asuakkhia samawk uh hidinghiam? Sawltak #zomidaily