Nigeria ah Gas puakkham, mi 100 val si

Nigeria ah Gas puakkham, mi 100 val si

Dec.26, 2015: Lungdam bawl tunkim ni in Nigeria leitaw lam a om Christiante teenna Nnewi khua ah Lungdam pawi ding a kisakkholh lai un industrial gas plant puak kham in, mi 100 val in sihna tuak hi ci’n zan in Nigeria President Muhammadu Buhari in pulak a, hih bangin mun khat a tuahsiatna hangin mi hi zah tak a sihna hangin lamdang a sak thu gen beh hi.

A gas puak kham nasia lua ahih manin nai kal sawtpi kuangin, a site a mel uh nangawn theih zawh loh dingin kang vom gawp uh a, pawl khat vut suak uh hi. Meikuang in a kiiim a inn leh mawtaw peh inn tampi kangsia hi. Hih gas puakkhapna kiang a teeng Ilochonwu Prince in hih gas pen zan hal zingsang nai 11:30 pawl in puakkham hi ci hi. Mi khempeuh in Lungdam pawi hun sung khom ding gas lei khol dingin a kithawi lai tak un hi bang tuahsiatna hong piang vat hi ci’n gen a, si luang ding dan 4-5 kikal ka muh hangin a luangte uh vut suak hi ci’n gen beh hi.

Hih gas plant omna panin gas koih a gual a gas bung metre 300 sunga om teng kangtum in, inn metre 400 a gamla a omte omna dong peh phei hi ci’n National Emergency Management Agency (NEMA) spokesman James Eze in AFPte kiangah gen hi. News report pawl khat in Lungdam bawl sunga zat ding an huanna dinga kizang butane gas pua mawtaw ten a suah khiat lai un puak kham kha hi ci uh hi. Pawl khat leuleu in hih gas kipuate keh (leak) ahih manin puak kham hi ci uh hi.

July kha in Niger delta ah gas lawng a puahphat lai un puak tam a, mi 12 na si ngei hi. Nigeria ah apaisa kum 10 sungin gas puahkhapna hangin mi za tampi na si khin zo hi kici hi. Nigerian National Petroleum Corporationte’ gas lawng panin mi gilo (gangs) ten gas bung 300,000 nisim in guksak den uh hi ci’n kiciamteh hi.

Thang Khan Lian
-MailOnline