Boeing 777 numei vanlenghawl lakah akum atawmpen Indian gammi Anny Divya

Boeing 777 numei vanlenghawl lakah akum atawmpen Indian gammi Anny Divya

Anny Divya akici numei pen India gammi hi a, kum 30 phakhinta hi. Ahi zongin leitungbup ah Boeing 777 Aircraft vanleng ahawl Commander numei khempeuh lakah akum atawmpen “the youngest female commander of a Boeing 777 aircraft” ci’n ki ciamteh cih CNN pan kiza hi.

India gamsung phadiak ah numei pasal ki deidanna “Gender Stereotypes” nasia mahmah a, ahi zongin hamsatna tampi phukha himahleh tuate kantan in Anny Divya pen Air India Airlines te kiangah Female Aviator khat hongsuak hi.

Anny Divya in CNN te tungah agenkhiatna ah kaneutung akipan vanlenghawl “Pilot” ka ut mahmah ci’n genkhia hi. Ahi zongin innkuansung ah vanlenghawl tawh kisai hong makaihtheiding kuamah omlo, meltheihzong neilo hi. A lungsim sungah vanlenghawl khat asuahding utcihtak in utpongmawk hi.

Tualeh kum 17 aphak ciangin vanlenghawl asinsak sanginn “Flying School” khatpan in Advertisement khat mukha a, Anny Divya zong tuamun ah kahtheihding hanciampah hi.

Vanleng tawh kisai atheihgei omlo, Flying Background neilo, ahilhding meltheih tanau zong neilo, vanlengthu leh aset omzia cihte bangmah theivetlo himahleh hanciam teta in, Pilot asuahdong lungkia vetlo hi.

Aircraft leh Technology avekin ama adingin athak vive hi a, apatpan sintawm ciatciat kulden hi.

Anny Divya pen India gamsung veve, khua thupilua ahilo, Southeastern India, Uttar Pradesh pan hisawnsawn a, khuaneu pan khuapisung nuntak khuasakzia phutkhiatzong abaihlo khat ahihi.

Ngeina kibanglo, omzia gamtatzia kibanglo in hamsatna tampi aphutkhak kawmkal ah lungkia hetlo ahih manin kum 19 aphak ciangin Training mansiangthei hi. Tuakhit ciangin 2006 kum akipan Air India te kiangah nasep kipanpah hi.

Video: Meet Anny Divya, world’s youngest woman commander of a Boeing 777

Tu’n vanlenghawl Pilot asepzawh kum 10 valbang himahleh aki muhpihkhak te’n numei vanlenghawl ci’n lamdang samahmahlai uhhi.

Numei khatin Boeing 777 Aircraft vanleng golpi te hawlding cihpen kimuan ngaihsutlo pongmawk hi. Ahi zongin Anny Divya pen India gamsung ah minthang mahmahta a, Celebrity Status khat suakzota ahih manin, khangno te’n engmahmah uhhi.

Related: India, Mumbai ah inn kicim in mi 8 in sihlawh, adangzong tampi liam

Mimal in hanciam nopna lungsim kiciantak nei in, nulepa te’n panpih uh ahih manin leitungbup Boeing 777 vanlenghawl numei khempeuhlak ah kum atawmpen Commander ci’n ciaptehna ngahta hi. Sawltak #zomidaily