Aug. 10, 2016: Nung kalin Syrian rebels ten Aleppo deih takin nawkin mun pawl khat la uh ahih manin tuate hawl kikna dingin Syria kumpi Lebanon gam pan-a hong kuan Shia Hezbollah movement, militias leh Syria galkap kigawmin galkap 3,000 val Aleppo ah sawl beh a, rebel ten zong Idlib province sunga om a galkapte uh Aleppo ah sawl beh sawm uh hi ci-in Syrian Observatory for Human Rights (SOHR) makaipipa Rami Abdel Rahman in gen hi. Aleppo ah kidona nasia semsem ding hih tuak hi.
Syrian state news agency SANA in zong Aleppo leilu lamah Syria kumpi in tung lam panin nasiatakin “intensive strikes” kici dipkuatna piangsakte (terrorists) gamtatna munte kap uh hi ci-in suaksak hi.
Rebels tuamtuam kipawlkhawmna a kihel Jabhat Fateh al-Sham (ni dangin al-Nusra Front a kici) ten Nipini in Aleppo ah Syria galkapte phual va thum va la hi ung ci uh a, ahih hangin Syria galkap ten kilehhawl kik zo a, 2,000 val kithat hi ci uh hi.
UN in Aleppo ah tui leh mei piakna kisiate puah phat ding tampi om ahih manin kikaptuahna khawl phot dingin kunh a, huhna van zong a kisam tampi om khin zo hi ci hi. US ambassador to the UN Samantha Power in zong Aleppo khuapi ki-umcihna a kisuahtaksakna dingin Russiate a gamtat hun ta hi ci hi.
Ahih hangin Russiate deputy ambassador to the UN Vladimir Safronkov in hih pen thuman thei lopi cihmawh man, ngawhna man lo, information campaign hi a, Syria politics buaina pen tu ngen bangin US in rebelste a gup den leh Syria buaina veng ngei lo ding hi ci-in dawng hi.
Source: Al Jazeera and agencies
Thang Khan Lian
Comment piaknop aomleh...