Tedim veeng thak ~ Dr. Dongno
Laisim u leh nau, Pa Khup Khan Thangin ong at Tedim khua veeng thak kibehlap ding thu ka zaak ciangin ka lungdam mahmah hi. Nidangin Mualtuk khen leilulam ah Palpha Hiangtui kici mun khat om ngei aa Tedim Saangpi aa PAT, Sia Pau Za Dongin van zuakna sumbuk neu khat nei ngei hi.
Tua vanzuakna ah mikimin akisap van akingahna Ad, kyawngya, “Palpha Hiangtui ah van kizuak: Thangkhuai pum, Thangkhuai peek, Ci, Zanah, Sada, Pumuam” acih ka neulai un ka lolo thei zeel uh hi. Pumuam pen, apum aa kimuam, pummuam, cihna hi aa, India te’n, ‘supali’ acih, ‘kuunti’ ahi hi. Hih pen Tedim ah sumbuk van ki kyawnya masapeen hi dingin ka um hi.
Tua mun teng Hiangtui zong kici hi. A hih hangin tu aa veeng thak ding pen Tualzang khuakhung sakol tutphah, saddle, bang aa saupi azaangtam, akuak ‘di-idiai’ mun hoih mahmah ahih manin vanleeng khawlna ding nangawnin a hoih mun ahi hi. A beisa kum nih lai-in vanleeng khawl nading in zong ki en ngei-in ong ente-in hoih sa uh kici napi i Wungyi thuneite-in bang aci ngaihsut uh hiam i thei kei hi; akhangto gamte nangawn aa om ngei lo, tai 40 bek ki halin Haka ah vanleng khawlna leh Falam ah vanleng khawlna ong pia uh aa, gamkhangto sate sangin ahauzaw i bang aa lungdam huai veve hi.
Tanglai-in tua mun tengpen Khuangnung hausate uk sung ah om ngei aa, a Khuamual bawlte uh zong tawmtawm om lai kici hi. 2016 kum April kha sungin ka va en thei kha aa, a mawng suante uh tu aa Technical High School sangpi huangin na huam kha hi. A hih hangin kamphatna tawh tua mawng kungte ki phuk kha lo bilbelin kung li, tang diudeu-in po lai ahih manin manpha kasa mahmah hi.
Sang siapipa, Sia Khai tawh zong limtakin tua mawngte i kepcing ding athupitna ka kikum khawm thei uh hi. Amah’n zong na it mahmah ahih manin, kung khat bang a saanginn tawh kinai napi hoihtakin na kem aa amaa tung ka lungdamna ka gen hi.
Hih bang tangthu nei mun pen, Tedim khua ah kumpi thuneite leh Khuanu/khuapate-in limtak ong ngaihsunin, tangthu min nei veengmin, Khuangnung veeng i phuah ding kei zong hoih ka sa hi.
Athupi mahmah khat ah, mailam ah Tedim-in District Khazaing i ngah ciangin, kumpi inn lianpipi tampi ki lam ding aa kumpi nasemte inn mun ding zong kisam ding ahih ciangin tua hun aa ding geelkholhna zong i nei ding hi. Veeng mawkmawk bangin innmun kihawm khia zelzul lo-in kumpi inn mun dingin i kep ding leh town planning hoihtakin i neih ding thunei upate tung kong thuum nuam hi. Tualai sang aa mun hoihzaw om nawn lo hi. Iiplah huai hi. Dr. Dong No
Comment piaknop aomleh...