Oct. 31, 2016: July 15 in Turkey President Erdogan paihna ding (coup) deih in kiphinna hangin Erdogan in galkap ulian leh galkap tampi a tawpsak bek tawh hun sa nai loin amah laih khiatna dingin makai hi ci-a a ngawh US gam-a Pennsylvania khuapi beel biakna makai Fetullah Gellen tawh kipawlna leh kizopna nei dingin a upmawh galkap a hilo kumpi nasem (civil servants) 10,000 a tawpsak banah newspaper 15 val khakcipsak beh kik leuleu hi.
July 15 ni-a thatang hat thu tawh kumpi laih khiat ding kiphinna a pian’ khit nung kumpi nasem a kitawpsak 100,000 val ta a, mi 37,000 kiman ta hi. A kitawpsakte lak panin laisiam (academics), sangsia, zato inn-a nasem, thonginn cing leh forensics experts kicite zong tampi tak kihel hi.
Hih a nunung pen a Erdogan tawpsakna thu tawh kisai Kurdish press/media khempeuh a khak nop man leh kumpi in kuamah thu kizakna za dingin a deih loh manin a tawpsak leh media a khakcip nuam man hi ci-in Erdogan langpang ten gen uh hi. Turkey kumpi (government) leh President Tayyip Erdogan gamtat zia pen a langtang-a zawhthawh thu tawh (direct coup) thukham banga mikim a kibang a thukhenna/thukham (rule of law) leh a tamzaw deihna banga ki-ukna (democracy) zawhthawh thu tawh betdaihna hi zaw hi ci-in opposition Republican People’s Party (CHP) MP Sezgin Tanrikulu in Periscope broadcast ah a Twitter sungah tuangsak hi.
Kurdish mite teenna leilu-nisuahna lam-a om newspapers, wires, leh magazines 15 kikhak beh a, a kigawm in Kurdish media 160 kiim a kikhakna hi ta hi ci-in Sezgin Tanrikulu in a Twitter ah tuangsak hi. Tua banah university reactor pen a kiteel thawh hi a, tua university ngeina pen Erdogan in beisak a, ama’ deih leh ama’ sehte bek reactor in kiguang thei ta ding cihna hi.
July 15 Coup pen Erdogan in ama’ deihna bang bekin a vaihawm nuam manin leh kum 32 val autonomy ngen a kiphin (mi 40,000 val in sihna tuak ta) Kurdishte a nuai nuam man-a coup a bawl tawm hi kici hi. Erdogan in Coup neihna a kigolh teng sih dan (capital punishment) piak ding hi a cih hangin EU member ah Turkey khum nuam ahih manin EU in capital punishment a piak leh Turkey pen EU member in kisang ngei lo ding hi ci hi.
Source: Al Jazeera News And News Agencies
Thang Khan Lian
Comment piaknop aomleh...