ZIUSA Thupulakna (Press Release): January 23, 2017

Zomi Innkuan USA Kipawlna – Executive Committee pawlin 2017 kum a’ding a masa pen Thukikupna pen Jan. 21, 2017 ni in lawhcing takin kibawl zo hi.

Thukikupna sung ah;
Abeisa hun sung a Kipawlna maban kalsuannate etkikna
Kipawlna mailam kalsuan ding mabante kikupna,
Kipawlna Kivaipuakzia puahphatna ding vai kikupna,

2017 Kumcin Khawmpi vai kikupna, leh
Anuai a maban thupite vaihawmna leh khensatna kibawl hi.

UN ECOSOC Numei Khawmpi (CSW61)

Zomi Innkuan USA (ZIUSA) Kipawlna in United Nations Economic and Social Council (UN ECOSOC) nuai a Consultative Status kician khat hihna hangin, UN Numei Khawmpi (The Sixty-first Session of the Commision on the Status of Women) akah dingin Tangmi hong ngen uhhi. Hih Khawmpi ah ZIUSA Kipawlna tang’in akah dingin, anuai a Zomi Numei Makaite, Tanute, Sianute muanna tawh kiteel hi.

Myanmar Zomi Numeite:

1. Lia Cing Don Niang, ZCD, ZYA

2. Lia Cing Van Kim, ZSK, Zingsol, Tedim Post

3. Sianu Ciin San Cing, Bank Manager, ZWF

4. Lia Niang Theih Kim, ZNKY, ZYA, TA

5. Lia Niang Khawl Nuam, ZYA

6. Sianu Ngai Dim Niang, Zonu Tongluan

7. Sianu Len Hau Niang, New Steps Women Network

USA Zomi Numeite:

1. Lia Niang Geel Cing, FGA Media

2. Lia Lian Huai Kim, University Student

UN ECOSOC Youth Forum 2017

Zomi Innkuan USA Kipawlna tang’in UN ECOSOC Youth Forum 2017 Khawmpi akah dingin ZCD Party Khangno Makai khat ahi Pu Kham Lam Tuang kiteel hi. Pu Kham Lam Tuang pen UN Khangno Khawmpi akah dingin January 29, 2017 ni in New York khuapi hong tung ding hi.

Zomi Movement leh Zogam Khantohna ding Panpihnate

1. Zomi Youth Association (ZYA) kipawlna in ZYA Zum lamna ding huhna ahong ngetna tawh kizui in, ZIUSA Kipawlna huam sung a Zomi Innkuan kipawlna tuamtuam pan panpihna kikaikhawm a $7,000 val kingah hi. ZIUSA Kipawlna Pawlsum panin $2,000 kibehlap a, ZYA Zum lamna ding panpihna vekpi $9,000 kipuak hi.

2. Kalaymyo khuapi ah Zomi Nam Ni bawlna ding, Zogam ah Numei lam tawh kisai khantohna ding vaihawmna, Delhi khuapi a om Zomi-te kipawlna maban, nisuahna leh nitumna lam ah Zomi Movement maban kalsuanna leh LZI Kipawlna maban kalsuanna cihte Kipawlna min tawh panpih puak dingin kikhensat hi. Hih panpihna teng ading akigawm in sumtang $6,000 kizeek ding hi.

Executive Committee

Zomi Innkuan USA, Inc.