Zogam ah sangsia sinna college sang hon ding hithei nailo

Zogam sungah sangsia sinna college hon ding piangthei nailo hi ci in pilna lam tanu huh ahi Dr. Zaw Min Aung in gen hi.

Division le gamke khat pepeuh ah sangsia sinna college akihon theih nading in asinding mi 200 peuhmah aom kul ding aa asanginn lam nading mun zong atawm pen area 4.3 pan acre 12.05 sang atamzaw akisapna thu, pasal te giah nading sawm, numei te giah nading sawm te zong kisam ding ahiman in sangsia sinna college khat lam nadingin akisam tam lai lua hi ci in gen hi.

“Zogam sung ah sangsia sin, diploma kah sangnau pang te pen tulaitak in Monywa college le Pakhukko college te ah kah uh hi. Kum khat mibang zah kah uh hiam cih enkik leng hang mi 50 pan 100 caing bek akah kimu thei hi. Tua ahihman in Zogam sungah sangsia sinna college lam nading aleitang le inn te lam nading sumkhen(budget) ngah takpi ding maw cih le sangsia kilawh sapna te ah akipuaksan laitak ahihman in sangthak behlap ding thu kingaihsun nailo hi” ci in Dr. Zaw Min Aung in gen hi.

Sangsia sinna college sang khat ah science sawm te, practice sawm te le aman tawm annekna sawm te le zum nasem te innding cih te kisam in zum nasem ding le sangsia sin te ahilh ding sai 79, le adang zum nasem mi 102 tawh zum nasem vekpi 180 bang kisam ding hi ci hi.

Tanu huh pa ahi Dr. Zaw Min Aung ii genna te pen abeisa July khat 31ni aa kibawl mipi luttaw khawmpi ah Zogam metang khawk nambat (5) ii mipi luttaw tangmi Pu Kham Suan Mung in Zogam leilu lam le Sagaing division ii saklam mun te ah sangsia sinna college khat Tedim khuapi le Khaikam khua te ah hong honsak nading gelna ommaw omlo cih adotna tung tawn in akidawn kikna ahi hi.

Mipi luttaw tangmi ahi Pu Kham Suan Mung in “Laihilh sia te ii siamna asan zawk nading le ka tenna mun le gamke sung ah sangsia sin theihna aom nading le Zogam aading kizopna lampi te hoihin atawmbei sangsia sinna college kumpi te in hong honsak ding akisap na thu hong theihsak hi ing” ci in gen hi.

Sr: Democracy today Daily
Lailet – Peter Suumpi

Zingsol