ZYA pan Lungnoplohna Pulakna

ZYA pan Lungnoplohna Pulakna

ZYA Motto ahi “Kipumkhatna in gualzawhna hi” (Psalms 133), cih tawh kizui in, Zomite kipumkhatna hong khan semsem nading lam tuamtuam pan ki hanciam hi. A beisa kum in Zomi Kamphen kullo Tuiphum Pawlpi Khenpi 3 le 4 a kikhen thang teng lawngkhat in ding in hileng Zomi mailam ading tampitak kipumkhatna hong khang zaw ding cih ZYA pan lunggulh luatna tawh “Zomi Baptist Leaders Summit 2017” (ZBLS) ci in Kum zalom 21 sung Zomi Tuiphumte Kalsuanzia ding “Guiding the way into 21st century” cih thulu tawh Zomi Tuiphum sung ah Makaipi mi 50 kisam in kipawlkhop huai zia thukikupna Mingyi Hotel, Kalaymyo ah nasiatak in ki nei hi.

Hih Thukikupna ah kipawlkhop ding hoih a salo omlo ban ah kipawlkhop ding hoih lua ahih manin thu hong van to ding in Working Committee/ Formation Committee mi 7 zong kigel khia zo pah hi. Hih mi 7 lakah zong ZYA General Secretary pen 1 in kihel hi. Tua kawmkal ah a 2 Veina Zomi Institute for Contemporary Christianity (ZICC) cih in hong zomto in hih teng mah kikum in hoih kisalua mahmah le kilunggulh hi cih tawh mipi kilawp mahmah in ZBLS a kiseh mi 7 ban ah 2 kibeh lapin mi 9 teng in hong makaih to ding mipi lawpmahmah sa in innlam kizuan tek hi.

Baptist vai ahih teh cih in tamzaw thukim na mahtawh ZYA General Secretary zong in ki awn in Baptist makai muanhuai mahmah mi 9 aki seh ahi hi. Advisor ding in zong mi 4 pen vekpi thukimna mahtawh kikipsak hi.

Zomi Tuiphum Pawlpi kikhenthangte kipumkhat ding deih luatna tawh ZYA in sep loh dingpi semin a kivaihawm ahi hi.

Hih Formation Committee mi 9 le Advisor mi 4 te hong kimu in mipi tung ah lungkimpihna lek theih nading in Association le Convention kumcin Delegate Agenda hong guan nading un muanna lianpi tawh vaipuak kipia hi.

ZBLS ah Thugen ding a ZYA in a kicial Evan Langh Do Khup in “Tangthu in nang hong bangcih ciapteh ding hiam, Zomi Tuiphumte agawmtuah pa maw akhenkham pa cih na tangthu ding tu ni-in kam kumkhawm ding hihang” ci in nasiatak in makaite thapiakna le tona hong nei hi. ZBLS le ZICC panin vekpi lungkim a kikipsak Formation Committee in tuni ciang bangmah thasan na, vaihawmna nong neih theihlo uh pen makaipi khat le nih hang ahih na zong ka na za uh a, ZBLS a pian nading a thasan, a vaihawm ZYA le sumlepai a bei lawhte tung kalung uh nuamhetlo hi.

Tua ahih manin Formation Committee lampan haksatna, lemlohna a omte Zomi Buppi (adiakin Zomi Tuiphumte) theih ding in nong pulakna ding uh le a taksuah zawh lohna ahang banghiam cih akipan nong pulak nading un ZYA mintawh kong thum uh hi. Mipi in lawp mahmah le lunggulh mahmah thu pen Makaipi khatlenih thu tawh nong bei mang sak ziau uh pen Tangthu in nana ciamteh veve ding hi.

Tua ahih manin ZYA pan lunggulh luatna le kipumkhat ding deihsak luatna tawh kivai hawm kum zalom 21 Zomi Tuiphum Pawlpite kalsuan ziading tawh kisai lawhcinna a omloh na le ZYA in kisapna tampi Mah omlai ahih na thu Lungnoplohna Zomibup theih ding in kong pulak khia uh hi.

ZYA Myanmar
Jan 22, 2018