ZOFA PAN ZAKSAKNA : A 12 veina ZOFA-Cup2017 kimawlna ah kikhel dingin anuai ateng in Team lutman leh CV Form hong lakhinta uh hi.1. ZYA Nahnuai, 2. CR 7, 3. Dalkhai, 4. K B C5. ZYA Singgial, 6. ZYA Buangkung, 7. KTYF, 8. TFC Note : ZOFA-Cup 2017 Sponsor Tg. Suan Lam Mang Myanmar Selected & Chin United FC Player.
ZYA AH LUNGDAMKOHNA NEI : July 22, 2017ni-in zan nai 11:00 pm hunpawl in Dist palik zum mai ah Pa Kai Khan Mang tapa Accident in guahlak ah khua phawklo in om ZYA pan Pa Khup boih leh alawmte in mu in ZYA Motor tawh Zato puak pah in apuante kawtlua in Layseih Store ten apuan ding pia in Cidamin inntung kik hi. Pa Mang zong lungdamlua in ZYA Zum ah Ks. 55000/- tawh hong pai-in lungdamkohna hong nei-in kilungdam mahmah hi. Zomi thu theilo vanglak in lampi ah Accident khat peuh ahi a Cimawh dongtuak khat peuhpeuh ZYAte ko un, ZYAte sepding hi ci-in ngaihsun uh hi. ZYAte in veina tawh cimawh dongtuak huh theihzah panpih theihzahin kihuh kipanpih mah a, ZYAte nasep hituanlo in Zomi Pasian thu-um khempeuh nasap ding ahi hi. Hi bangin lungdam hongkote thupi sa in kalung uh zong dam mahmah takpi hi.
CHRISTIANTE KIBAWL SIA : Kawlgam, Sagaing Region sunga om Tai Htee Kyaung Township a GTP Missionary Pasian thugen Sia Hram Ceu tung tawnin Daw Khin Marte nupa piangthak in a nu le pa unau teng zong piangthak in, akhua a om Phungzi 10 leh khuabup banah khua veng 3 pan inn 900 kimin Mo- tor 7 dim suangtawh deng uh a, Sia Hram Ceu phone set in Palik 10 tawh delh in a kapsawm uh ciang bek in taimang uh ci hi. A si kua mah omlo in aliam omin bawlsiatna thuak mi 15te thunget na-ah phawk in , huhna zong kipia thei hi. GTP Mission ah Sia Mang Za Suan Director ahi hi. Thungetna-ah phawkciat ni.
DAW SUH KYI LE KBC MAKAITE : Kawlgam sungah daihna leh kilemna a om nading lunggulh in a hanciam Kawlgambup thudotpi Daw Aung San Suh Kyi-in July 24, 2017 ni-in Nyipyitaw ah Kachin Bap- tist Convention (KBC) pan President Rev. Lalawk Gyung Hkawng, Secretary Rev. Dr. Hka Lam Samson leh apawlte samkhawmin kimuh khopna neihpih hi. Hih kimuh khopna ah KBC pan adang Pasian nasem 8 bang kihel in, Kumpi lampanin Vuanzi U Kyaw Tint Swe, Dr. Tin Myo Win, Dr. Win Myat Aye, U Min Thu te kihel uh hi.
KAWLGAM TUICIIN THU : Tu kum tuk hun sungin Kawlgam sung Region le State gawm 8te ah tui khanna hangin dongtuahna om kawikawi a, July 23, 2017 ciangah tuitup inn 36939 tui taih inn 54, tuiciin hangin a kisuan inn 33233 val omin, mipi 134590te in dongtuahna thuak kha uh hi. Zomi atamzaw in i phawk khak khol loh hangin Kawlgam zangkuam teng tuiciin tungin buai mahmah uh hi.
KAWLGAMAH NATNA LAUHUAI : Tu laitak Kawlgam khuapi Yangon, Matupi, Nyipyitawte ah natna lauhuai mahmah leh angahte a tamzaw a si H1 N1 Flu Virus kici (Swine Flu) lang mahmah in Thai leh Sente in gamgi kizopna teng khak sawm banah Singapore Vanleng tual ah Kawlgam mite atuamin koih pah lianlian uh hi. Khua sungvak leh kamtuam (Mask) thuahin vakding, nakhatpeuh lawn simin khut satpiang tawh silsiang pahpah ding ci hi.
H1 N1 PULNATNA KIDAL NADING : Tu laitak a alauhuai mahmah pulnatna (H1 N1) panin anuai abangin kidal kholh huai ding hi.1. Kikawi kinam cihte pelh ding.2. Khutsil lopi-in kam, mit, nak lawng lo ding.3. Naptui tolh leh Tissue tawh nul den ding.4. A pua pan naciah simin khut satpiang tawh sil ding.5. Cisa, naptuitolh, khut le khevot khua phawklo cih danna hih leh Zato zuanpah in.6. Cisanat; natna naneih leh midangtawh kinailua in om kei-in.7. Nak leh kampan kilawh phadeuh ahih manin kam/muk tuam hamtang ding hi.8. Mipi tamna lak ah omloh ding thupi hi.
KAL SUANGOM DAMNA : Tu lamteh i tuinekte siangtho zo nawnlo in Kal (Kidney) ah suangom cih kiza mun mahmah ta hi. Tua bang Kal asuang omte makengteh le cikhum huankhawmin atui dawndawn le hang damzo hi, adam zong tampi om hi cih viber pan thu kisuah kong suah sawn hi.
GIL TUI, THAU LUA KIAMNA : Tu hun ciangin a kua mapeuh in inek leh i nasep kilekkim (Balance) lo ahih manin damdamin kithau deuhdeuh in i gil hong tui, honggol semsem hi. Gil tui kiamna dingin tanpaza (Lemon) pum at in khuaizu tawh diahin tua pan tuisa, tuilum tawh diahin a tui nitak lup ding simin dawn den leng kiam ci hi. A hoih pen bel nanek leh nasep kilekkim leh hipah lel in nisimin Exercise bawl det ding hoih hi. Nasemlo annene pen lemlo dan hi.
CANCER NATNA DAMTHEI : Cancer natna pen tu ciangciang a dam zolo natna hi a, tun sum tampi bei kullo in damtheih nadingin, singtang maiteh hinglo in la, gawizanin a tuisuk dingin nisim na hih zawh kei leh kalkhat khatvei ta atui haikhat ta dawnden le cin na Cancer natna dam dingci uh hi. A tui nasuk ciangin manhai (Glass) te zang leng hoihpen hi. Na up leh sinin Cancer natna lozong dam ding hi.
NUMEI TAWH KISAI THEIH DINGTHU : Kawlgam bup numei lam tawh kisai kipawlna panin Kawlgam sungah numeite kinopneh kizawhthawh bawllua in, kingai-in kiluppih in tenpihlo cih bangin nam tuamtuam ah numeite kisim mawhlua ahih manin Hlutdaw ah kipsak dingin thukhun khat bawl inpuak sawm uh hi. Hih thukhun thak ah numei khat luppih in a tenpih kei leh thong kum 5 kia dingin, a numei-in nau apai leh kum 7 kia ding cih ahi hi. tua ahih manin hih thukhun pen Hlutdaw in hong kikup sak in hong kipsak nading uh a kihanciam hi ci-in zum lam pan thunei Naw Tawa Kah in Mediate tung ah gen hi. Hih thu a kipkhit ciangin khuatate tung dong ah hilh na kinei dinghi ci-in makaipi Dr. Win Myat Aye in gen hi.
THAI A KAWLGAM NASEMTE VAI : Thailand a Kawlgam nasemte tu in ahonhonin hong ciah ziahziah ta uh hi. July 21, 2017 ni-in Thai leh Kawlgam gamgi Myawady panin Kawlgam hongciah mi 84 lak ah Kawlgammi ahi lo mi 7 zong kihelkha in tuate thuneite in manin thong khum uh hi.
UN PALAI YANG HEE LEE : Kawlgam tawh kisai thukan dingin UN panin palai-in akiseh Yang Hee Lee pen July 9-21, 2017 ni 12 sung Kawlgam Rakhine State, Shan State leh Karen Statete ah khualzin kawikawi in a muhkhiat thute mipite leh thukante tungah pulak khiatna nei-in tua khit ciangin hongciah san a, UN ah Kawlgam tawh kisai a thupuak (Reports + tap&ifcHpm) ah thumanlo tampi om ahih manin lungkim huailo mahmah hi ci-in Kumpi lampan thusuah bawl uh hi.
TELCING MP THUNEITE VAI : Nung April 1, 2017 ni a kibawl kalhelh kitelna ah telcing Yangon Region sung pan NLD Party pan MP 3te a lang USDP Party panin mawh sakna (uefUuGufvTm) abawl uh pen July 21, 2017 ni-in kitelna lam vaisai thukhenzum panin sanglo uh a, NLD MPte a zo suak hi. MP ngahloh nungah angahkhinte vado bawlbawl hangin gualzawhna ding a baih nawnlo cihna hi.
US VISA LAK KIKSAK : America gam hawhtheih nadingin Yangon US Embassy zumah VISA ngenin Zomi 20 pai-in alut masa 2te in VISA ngahpah uh hi. Tua panin pusuak in zummai ah puaisa te in VISA ngahsak man $500 nala pahin tua puaisate sumlakna zum sung panin CCTV tawh mukha uh ahih manin Yangon Hledan tung visa ngah mi 2te samkik in a sum uh pia kik in visa pia nawnlo hi. Zomi US visa lut ding mi 40 bang omlai ci uh a, Zomi USA zin atamzaw pen puaisate $500 pia in tua tawh visa ngah atamzaw cimawk hi. Midangdangte ahih leh bel thukhat hi-in Zomi Pasian nasemte in sum golhguk pia in, US ah Pasian minpaulap in azin ihih leh bel lungkhamhuai dahhuai mahmah thu hi.
INDIA PRESIDENT KITELNA : India gam pen Kumpi (President) leh Prime Minister tawh a kalsuan Democracy gam hi-in tu laitak Kumpi asem Murkheerji pen a term cingta in Kumpi kitelna bawl uh a, Ram Nath Kovind in 65.65% tawh zo in India gam ading a 14 na Kumpi suahna leh kiciamna July 25, 2017 ni-in nei hi. Ram Nath Kovind pen kum 71 Dalit minam, Hindu upna-ah a khauh pai mahmah RSSte member hi a, Dalit Awn 200 om hi. Lawn khak noploh minamte ahi hi.
Related: Kawlpi leh Yangon atai Chintaungtan te Bus khat lamkal ah tuahsia, asi omlo
MEXICO GAM KHAMTHEIH VAI : Leitung ah Mexico gam pen khamtheih guihtheih lamah a minthang mahmah hi a, July 21, 2017 ni-in Kumpi lam leh khamtheih zuakte kikap kido uh a, khamtheih zuak makaipa tawh mi 8 kaplum zo uh hi. Thau tampi zong ngah uh a, Bus pi 2 zong mei tawh kihal tum a, koi lamte hal cih kithei nailo ci hi.
VANMANG KIMU HI : (1) Pa Sian Za Kham tanu Lia Niang Sian Uap, Tahan 15 ateng i NRC No leh sumbawm. (2) U Chit Swe tanu i NRC No. kimu ahih manin athei kha te’n na kigenin ZYA Zumah honglak na dingin kong zasak uh hi.
Comment piaknop aomleh...